Gaptek

 

Gapték

Karya : Muhammad Farid

Kelas : 9K

          Barudak keur anteng arulin ngaloprék konsol game di warnét mang Ikin. Si Saép anu kakaraeun nganjang ka warnét ngomong ka baladna, si Arul. “Ramé gening euy maén game di dieu téh ning.”

          “Éh, kieu-kieu ogé urang mah kapan geus teu katinggaleun jaman teuing.” Témbal si Arul.

          “Resep sigana mun urang boga konsol game kawas kieu, unggal poé pasti bisa maén game baé nginjeum ka manéh, méh teu kudu jauh-jauh deui kadieu.”

          “Ké atuh urang ménta ka kolot urang, méh dipangmeulikeun paranti maén game, sugan wé diturut.”

***

          Ti dinya, heuleut sababaraha poé, si Arul ngajak si Saép ulin di pos ronda, nya didatangan ku si Saép. Ana geus tepi ka pos ronda, kasampak si Arul jeung balad-balad anu lianna keur aranteng ngoprék tablét bogana si Arul nu karék dipangmeulikeun ku kolotna.

          “Laksana ogé geningan manéh bisa boga tablét.”  Cék si Saép bari ngusapan tablét anyar nu si Arul.

          “Yeuh, rék ngasaan moal maén game di dieu. Tuh tempo, batur mah geus seubeuh maén game tadi.” Si Arul mairan.

          “Lamun baé mah, ieu tablét rék diinjeum ku urang sapoé ayeuna.” Si Saép melas ka si Arul.

          Si Arul tuluy mikir-mikir heula sakeudeung saacan nginjeumkeun tablét manéhna ka si Saép. Manéhna tuluy  ngomong. “Heug baé ku urang diinjeuman ieu tablét. Tapi isuk geus kudu dibalikkeun deui ka urang, kadé ulah tepi ka ruksak.”

          Song diasongkeun tablét téh, dicokot ku si Saép tuluy dibawa ka imahna. Ana datang ka imahna, ku si Saép langsung baé tablét téh terus diomé. Tapi teu lila saeunggeus kitu, tuluy indungna anu keur barang asakan di dapur nyampeurkeun ka manéhna.

          “Jang, pangmeserkeun asem jig ka warung sakedap, mamah ieu nuju masak. Ieu artosna ku mamah disimpen di dieu, enggalkeun nya.” Indung si Saép nitah si Saép ka warung.

          Si saép nurut, cul tablét téh tuluy diteundeun dina méja makan. Sabot si Saép keur balanja asem ka warung, indungna bingung lantaran talenan anu dipaké nyiksikan bahan asakeun téh les ngaleungit teuing kamana, dikotéténgan ka ditu ka dieu angger baé teu timu.

***

“Mah. Ieu asem téa…” si Saép karék balik ti warung. Manéhna tuluy indit ka dapur rék mikeun asem ka indungna.

          Ana datang ka dapur, si Saép kacida reuwaseunna nempo indungna keur nyiksikan engkol, cabé, jeung wortel. Kumaha rék teu reuwas, indungna nyiksikan bahan dapur maké tablét anu tadi ku manéhna teundeun luhureun méja. Éta tablét langsung dicokot ku si Saép.

          Si Saép tuluy pepeta ka indungna tétéla yén anu dipaké alas nyiksikan bahan dapur téh tablét anu diinjeum ku manéhna ti si Arul jang maén game. Atuh indungna si Saép téh reuwaseun kacida.

Si Saép tuluy ngilikan kana tablét anu karék dipaké jadi gegenti talenan, sieun aya bagéan anu ruksak. Najan euweuh komponén anu ruksak, tablét téh teu daékeun hurung najan geus dipencét unggal tombolna. Atuh si Saép téh kacida sieunna. Sieun dititah ganti rugi, sieun dicarékan kolotna si Arul, jeung sieun nu lain-lain deui. Bakat ku kesel, si Saép kalah malik ambek ka indungna, manéhna jadi nyoroscos teu tarima tablétna ruksak alatan dipaké talenan. Geus kitu mah, si Saép téh bus ka kamar.

***

Isukna, enjing-enjing kénéh geus aya anu keketrok kana panto imahna si Saép, dibukakeun ku si Saép, horéng nu datang téh si Arul. Si Saép sieuneun ditagih jangji ku si Arul. Ari si Saép rék ngomong, si Arul miheulaan.

          “Saép ieu urang mawa colokan casan jang tablét téa, kapan ti kamari téh can dicas tablétna. Éta pasti ayeuna téh keur pareum tablétna, yeuh geuwat cas heula.” Pokna téh.

          Geuwat ku si Saép langsung dibawa casanna, langsung dicolokkeun kana tablét téa. sabot ditungguan ngecas, si Saép ngahuleng. Manéhna mikir, samurukanna gara-gara dipaké talenan, tablét téh jadi rusak. ari pék téh geningan ukur béak batré hungkul. Kabayang mangsa manéhna kuat ka nyeuseulan indungna sorangan, si Saép jadi ngarasa dosa. Ahh dasar budak gapték.